Eurasian Goshawk

Accipiter gentilis

Die Hauk (Accipiter gentilis af Astur palumbarius mäd ju Uutsproake Ástur palumbárius, dt. Habicht) is n Fuugel die der uur Dierte fangen un apfreeten däd.

Lieuwend

Lieuwendsruume

Die Hauk is in n Woold, as t.B. in ju Taiga, oaber uk in Middel- un Suud-Europa un groote Deele fon Noudamerikoa tou fienden. Dät noudelke Skeed fon dän Lieuwendsruum faalt maasttieds uumtränt ap n noudelken Polarkring. Gnau kon man dät oaber nit kweede, dät gjucht sik ieuwen ätter ju noudelke Gränse fon n boreoalen Näddelwoold, ju in dät Aaste fon Noudamerikoa fääre suudelk is. In dät Suude gungt hie nie oafter fääre as bit tou n noudelken Weendekring, bloot in Mexiko un Suudaastaasien.

Kost

Die Hauk frät Fuugele un litje Suugedierte.

Bie moanselke Siedelengen

Fröier ron ju Klukhanne mäd hiere Suukene uk so fräi buute hääruume. Dät wiste die Houk uk goud. Die hoalde sik dan smoals sun äärm Suuken. Deeruur hääbe wie uus dan altied so benoard un wieren dän groote Fugel läip dul. Man sun Houk häd uk Smoacht. So goadelk koom him nit so oafter sun Schmaus toumäite.

In ju Natuur

In ju Natuur häd die Hauk two Wiesen uum tou joagjen: Äntweeder ferfoulget hie sin Offer in ju Luft un moaket et ap dän of höchstens n bitje buppe dän Gruund dood, of hie joaget, toun Biespiel Oanten un Wrouten, tou Fout. Hie häd neen bestimde Offere, hie joaget aal do Dierte do him sääd moakje un sik nit so goud weere konnen.

Unneroarde

• A. g. gentilis: Noud- un Middeleuropa, suudelk bit tou do Pyrenäe, suudelke Alpe un Karpate, aastelk bit tou dät middelke Ruslound
• A. g. marginatus: Suudelk an ju Nominatfoarm ansluutend, Spanien un Marokko bit Kaukasus un Elburs; dunkerer un n bitje litjer as ju Nominatform
• A. g. arrigonii: Korsika un Sardinien; noch dunkerer un litjer as A. g. marginatus
• A. g. buteoides: Noudaastelk fon ju Nominatfoarm, fon Noudsweden, man ätter moonige Autore uk eerste fon dät Kola-Hoolfailound an aastelk bit Wääst un Middelsibirien sowät bit tou ju Lena, suudelk bit tou dän Raant fon ju Taiga-Zone; gratter un besunners in dät Juugend-Klood ljoachter as ju Nominatform
• A. g. albidus: Noudaastelk Sibirien bit Kamtschatka; noch gratter as A. g. buteoides, dät rakt in disse Unneroard ne griese un ne wiete Variante.
• A. g. schvedowi: Suudelk fon A. g. buteoides und A. g. albidus in ju Wooldsteppenzone un in do temperierte Loofwoolde fon Aast-Asien bit Hokkaidō; Faawe un Grööte sowät as bie A. g. marginatus
• A. g. fujiyamae: Ap ju japaniske Haudinsel Honshū, aisk dunker, ju littjest fon aal do Unneroarde.
• A. g. atricapillus: In n grootsten Deel fon Noud-Amerikoa; blaugriese Bupperkaante, gjucht kontrastriek Teekenge ap dän Kop, säilden Individuen mäd ne fien striekelch un sprinkelch Unnerkaante un mäd ne karminroode Iris. Die Oardstoatus foar disse un ju foulgjende Unneroard diskutiert me noch (wan dät ne oaine Oard is, hat dät Accipiter atricapillus)
• A. g. laingi: Vancouver- un Queen-Charlotte-Ailounde foar ju Kuste fon ju kanadiske Provinz British Columbia; dunkerer as A. g. atricapillus
• A. g. apache: Wooldgebiete an ju Skeedenge fon Mexiko un USA; ljoachter as A. g. atricapillus.

Wällen

• James Ferguson-Lees, David Christie: Guide des rapaces diurnes du monde Frantsööske Uutgoawe, Ferlaach: Delachaux et Niestlé, ISBN 978-2-603-01547-6