Pong-pongan ya iku jinis kéwan kang duwé sikil cacah sepuluh lan saka kulawarga Crustacea. Lumrahé duwé weteng kang mlungker lan empuk lan disingidake ana ing sakjerone omah keong segara.
Akeh-akèhé spésies pong-pongan duwé weteng dawa kang mlungker lan empuk ora kaya déné urang kang duwé weteng atos. Weteng kang empuk mau disingidake ana sakjerone omah keong kang digawa ing ndi baé. Ana ing omah keong iku mau uga, pong-pongan bisa nyingidake kabèh awake. Nalikane omah keong kang dinggoni wis ora nyukupi, pong-pongan banjur golèk omah keong kang luwih gedhé kanggo pindah panggon. Ana pira-pira jinis pong-pongan kang duwé tingkah kang nganeh-anehi : mlumpuk ana sawijining papan, banjur pong-pongan kang gedhé pindah marang omah keong kang luwih gedhé lan nglungsurake omah lawase kanggo pong-pongan liya kang luwih cilik. ngono iku mau nganti pong-pongan kang paling cilik uga nampa lungsuran.
Pong-pongan racaké urip ana ing banyu mligi ing segara, saka pasisir nganti segara kang jero. Ana uga kang urip ing dharat sanajan nalika ngendhog uga perlu nyemplung banyu. Akeh-akèhé sesaba lan golèk pangan ing wektu wengi (kéwan nokturnal)
