'Timsennent (tuttwasemma: Timerqemt), (Assaɣ usnan: Carduelis carduelis) d aylal meẓẓiyen deg tfesna n igṭaṭ d twacult n tbenferriwin, Yettidir seg Uruppa n umalu ar Sibirya u seg Tafriqt n ugafa ar Asya talemmast yerna yettusekcem ar waṭas n yidgan deg tegnit am Ustralya d tmura n Temrikt n Wenẓul, Tettusismel deg Tiddukla tagreɣlant i taggaẓt n tgama d akken-it d talmest ur tettwaggez
Deg wučči-ynes tegguni ɣef yifsan n yimɣan imegziyen am yifsan n ubsis d isennanen d kra n igumma
Addud n Timsennent d win igan gar n 12 ar 13 cm, Afriwen-is mara ldin ttilin gar n 21 ar 25 cm, azuk-is gar n 14 ar 19 g, Timsennent d aylan iẓlin (icebḥen) s waṭas, udem-is d azeggaɣ s uqerru d aberkan. S sin n wafriwen d iberkanen yal yiwen dges azawag d awraɣ
Timsennent tettidir deg yiger, anda llan yimɣan yerxan am ucikaw d ubsis, Tra (Tḥemmel) daɣen ifergen n urtiyen d yiran n iberdan d tregwa n waman.
agdef-is yetteg ɣef tseṭwa yerxan, tama n yimɣan yessefruruyen absis.
Timsennenin ttidiren-t eg tegrawin, ttafgent akken, ttrusunt akken. Anda yella ubsis dlant fell-as. D tifregtin daɣen i ttinigent, seg temnaṭ ɣer tayeṭṭ. Ttɣimint akked alama d tafsut. Imir ad bṭunt d tiyuga. Yal awtem d tewtemt ad ddukklen deg sin akken ad sefrurxen. D tawtemt i ibennun agdef. Ma awtem izegg-as-d kan i lmendad, yettarra amihi fell-as. Melmi i frurxent tmellalin i sin yid-sen seččayen ifrax-nsen.
Seg tazwara n unebdu tawtemt tbennu igedfen ɣef useklu. Tetteg-itt d tameẓẓyant. Teggar-itt s wadal n waman d yimɣan, usu-ynes d afraw neɣ d taduṭṭ n wulli.
Tessrusay gar n 4 ar 5 n timellalin tzeddel fellasen-t gar n 12 ar 14 n wussan. Ad teqqim akken alama tfukk tallit nni. Kra tekka dinna. Deg tallit nni d awtem id yettawin učči .
Llant temreqmin timezgiyin, llant tminigin. Ttidirent gar Tefriqt n Ugafa akked Turuft.
Aggaz d usmun
Timreqmin, teddunt ad negrent. Zik-nni ggtent deg laxla; ass-a, jlant gar wallen. Tteggiden-tent medden; ggaren-tent deg laqfus i ccbaḥa. Deg ssuq n yefrax, d timreqemt akk i yeɣlayen gar yifrax. Rnu daɣen, anekcum n wakal iburen i yettuɣalen d timizart n tfellaḥt neɣ d adda i usali n tudrin d yiɣerman swaɣayen tudert n tmerqemt.
Ass-a, ccetla tettwaḥrez, tanduyt tettwagdel. Maca, iseggaden ttkemmilen ahdum-nsen, ɣas barra i usaḍuf i ggaren aḍar. Ar melmi ?
Adlis n tmaziɣt n useggas wis 3 n ulmud alemmas n tmurt n Lezzayer (sb 66-67)
'Timsennent (tuttwasemma: Timerqemt), (Assaɣ usnan: Carduelis carduelis) d aylal meẓẓiyen deg tfesna n igṭaṭ d twacult n tbenferriwin, Yettidir seg Uruppa n umalu ar Sibirya u seg Tafriqt n ugafa ar Asya talemmast yerna yettusekcem ar waṭas n yidgan deg tegnit am Ustralya d tmura n Temrikt n Wenẓul, Tettusismel deg Tiddukla tagreɣlant i taggaẓt n tgama d akken-it d talmest ur tettwaggez
