Yellow Loosestrife

Žołty wjerbnik^[1] (Lysimachia vulgaris) jo rostlina z pódswójźby myrsinowych rostlinow (Myrsinoideae) znutśika swójźby primulowych rostlinow (Primulaceae).

Kwiśonki

Lysimachia vulgaris

Wopis

Žołty wjerbnik jo trajne zele, kótarež dośěgnjo wusokosć wót 50 až do 150 cm.

Kijaški su kulojte, zrownane, roznogaśowane a krotko kósmate.

Łopjena

Łopjena su jajojśe-lancetojte, załzojśe dypkate a zwětšego pó tśich až pó styrjoch mutwje wutwórje. Wóni su dwójce až pěś razow tak dłujke kaž šyroke.

Kwiśonki

Kwiśo wót junija až do awgusta. Kwiśonki stoje w pyramidojtem kwiśonkowem stołku a njasu pěś owalnych cypliškow. Keluškowe cypliški su na kšomje cerwjenojte. Krona jo złotožołta, na spódku cerwjenojta a dośěgnjo wjelikosć wót 1,5 až do 2,5 cm, mjaztym až kronowe łopjeńka su owalne a kronowe cypliški su na kšomje nage. Proškowe nitki su załzojśe kósmate.

Stojnišćo

Rosćo na žrědłach, w groblach, ługowych lěsach a bagnowych łukach. Ma lubjej humozne zemje.

Rozšyrjenje

Rostlina jo w Europje rozšyrjona.

Wužywanje

Nožki

1. ↑ ^{1,0 1,1} Petrick, W. et al̇.: Flora des Spreewaldes. Natur und Text, Rangsdorf 2011, b. 247 (Serbske mě za Lysimachia vulgaris).

Žrědła

• Schauer - Caspari: Pflanzenführer für unterwegs, ISBN 978-3-8354-0354-3, 2. nakład, 2008, bok 132 (nim.)
• Spohn, Aichele, Golte-Bechtle, Spohn: Was blüht denn da? Kosmos Naturführer (2008), ISBN 978-3-440-11379-0, bok 276 (nim.)