O burro u somero / somer (Equus asinus (L., 1758)) ye un mamifero domestico d'a familia d'os équidos, més chicot y con orellas més luengas que no os caballos. Se diz pollín de l'animal chóven, emplegando-se lo termin guarán ta os mastos sementals.
Un guarán puede cobrir fembras d'altras especies emparentatas, como una yeugua, y dar potretz hibridos viables (anque estérils). O entrecruz d'un guarán con una yeugua s'ha feito clasicament ta librar mulas (bartos u mastos quan son masclos) que son animals muit fuertes, resistents y dócils, razón per a qual s'aconsideran animals particularment valiosos ta carreyar pesos en distancias luengas, sobre tot en terrenos de montanya u deserticos. Os muletz naixitos d'una somera cobierta con un caballo son més chicotz y febles, por ixo se mira siempre de fer o entrecruz per a vía inversa.
Anque muito menos comuns, tamién se son aconseguitos bells ibridos de burro domestico y dibersas especies de zebra, conoixitos en anglés como "zeedonks", que podría traducir-se como «zeburros». Como totz os hibridos d'equidos diferents, os hibridos d'o somer son esterils perque tota as especies d'o chenero Equus tienen numers diferents de cromosomas, que resultan inaparellables en os hibridos. Os caballos en tienen 64 y os someros 62, producindo-se asinas hibridos (as mulas e mastos) que no en tienen si que 63, y en tenendo lo numer impar no pueden fer a segregación meyotica d'os suyos gametos y remanen esterils.
Esiste una especie (con diversas subespecies) de somers salvaches en as estepas d'Asia, ditos onagres u hemions, Equus hemionus. Una altra especie de somer que ye salvache en Africa ye l'Equus africanus, en o qui qualques investigadors son quiesto veyer o antipasau d'o somer domestico.
Dende las orichens d'a historia, os somers s'han feito servir en Europa y Asia més occidental ta porteyar cargas, estibar carros y carreyar personas. Anque no son de luent tan rapedos como os caballos, son animals més lonchevos, o mantenimiento suyo ye menos costoso y tienen gran resistencia y achilidat quan que os camins son deficils. Encara en l'actualidat son animals d'una gran importancia economica en países en vías de desarrollo.
Os pollins tienen una gran reputación d'estar capezutos, pero ixo se debe a la malinterpretación de belas personas sobre o suyo sentito de l'autopreservación. Ye muito deficil de forzar un somero a fer bella cosa quan este vei que no bi n'ha de sacar treslato. Modernament, han proliferato os estudeos sobre lo suyo comportamiento, anque encara son prou lemitatos. Os somers pareix que son animals aprevenitos, amigables y enchugarditos, y prou més intelichents que no se'n heba considerato tradicionalment. Manimenos, en que s'ha ganato a suya confianza pueden estar buenos companyers de treballo y recreyo. Ante parte, se los conserva en bells países occidentals como animals de grancha y como mascotas quan que lo suyo emplego como bestias de carga ya ye desapareixito. Tamién son bestias populars en puestos toristicos y de recreyo ta paseyar os ninos.
Estirando d'un carret.
Carriando con bastes.
Carriando con espuertas.
Carriando boticos.
Carriando cheta (lenya menuda).
Guarán de raza zamorano-leyonesa.
Pullinet.
O burro u somero / somer (Equus asinus (L., 1758)) ye un mamifero domestico d'a familia d'os équidos, més chicot y con orellas més luengas que no os caballos. Se diz pollín de l'animal chóven, emplegando-se lo termin guarán ta os mastos sementals.
