Ł'onaro moro (nome sientifico Alnus glutinosa, in todesco Schwarzerle, in inglese black alder, in tałjàn ontano nero) el xe un onaro ke'l crese fra el pian e i 1200 metri, in specie drio ai fosi o in ogni caso rente ał'aqua: el xe difati na pianta igrofiła. Łe raixe łe vive in sinbiosi co dei bateri azotofisatori, cusì ke ła tera tutintorno ła se inpiena de azoto e sostanse organiche, diventando pi fertiłe. Naltro vantagio dei onari neri xe ke cołe so raixe i rinforsa łe rive dei fosi e dei fiumi. El legno, de cołor xało-arancion, el vien doparà dal marangon, dał'ebanista e dal carpenter. Na carateristega del legno xe ke quando ke'l vien meso in aqua el diventa durisimo e resistente. Par questo el xe indicà par far pontiłi o pałafite: xe coi onari neri ke xe sta fata ła pi parte dełe fondamenta in legno de Venesia.
