Банкіўскі певень (Gallus gallus) — птушка сямейства фазанавых.
Пашыраны ў Індыі і Паўднёва-Ўсходняй Азіі. У прыручаным стане завезены на Яву, Філіпінскія выспы, Новую Гвінэю і выспы Палінезіі, дзе месцамі зьдзічэў. Жыве ў лясных і кустовых джунглях у гарах і на раўнінах.
Даўжыня цела да 66 см, маса самцоў 0,9—1,25 кг, самак 0,5—0,75 кг. Афарбоўка самца чырвона-залацістая на сьпінным баку і чарнавата-бурая на брушным, самкі бураватыя. У самца высокі мясісты грэбень на галаве, голыя шчокі і 1 або 2 вушныя лопасьці, або «завушніцы».
Гняздо будуе на зямлі ў паглыбленьнях. Корміцца насеньнем, зернем, часткамі расьлінаў і насякомымі.
Ад банкіўскіх курэй паходзяць шматлікія пароды свойскіх курэй.
