Guarda Rios Comum

O martinet pescataire (Alcedo atthis (L., 1758)), u bernat pescataire en a Ribagorza, ye un muixón d'a familia d'es alcedinidos de colors muito vitarizas, naranchencas per a tripa y arredol d'es uellos, y caracteristicament d'una tonalidat azul u torquesa per as partis mes superiors d'o cuerpo, con brilluras metalicas en totas as plomas suyas. No tien dimorfismo sexual.

Gosa trobar-se no luent d'es cursos d'augua, encara que no s'está a o puesto mes tiempos que ta medrar es niedos en reproducir-se, movendo-se de puesto t'altro per a resta de l'anyada, se diz que tien habitos transhumants.

As suyas caracteristicas fisicas, amés d'as colors, el fan inconfundible; una mida chicolona (no guaire mes de 15 cm de lonchitut) con un tozuelo sorprendentament grandizo per a mida d'o cuerpo, y unas aletas plen curtas que no rebasan es 16 cm d'amplaria en volar l'animal, fan que tienga un aspecto caracteristico. Ye un muixonet pescataire, como o suyo nombre indica, y con unas singulars trazas en arrullar-se de tozuelo ta l'augua, pesca chicoz peixes que previament enveye d'alto d'una branca u altro elemento de l'ambient, d'on agüella per posibles presas.

O martinet pescataire con un peix en o pico.

Uevos d'Alcedo atthis.

Altras vegadas, quan a baseta a on se troba pescando no tien garra puesto a on aposar-se, o martinet s'está en alto a l'aire batindo as aletas rapedament, de manera semilar como fan es ciquilins, y d'allá se deixa cayer de tozuelo ta l'augua quan enveye a presa.

Construye es niedos en as ripas talutadas d'es ríos u barranques a on i abundan es peixetz que consume. O niedo ye alavez escardato d'a tierra con forma de túnel que puet plegar ta mes d'un metro de fondo, estando-ne a rematanza una rudimentaria cambra de cría a on medrarán es polletz luent d'es periglos d'o suyo ambient, como as loiras, coluebras u ratas d'augua.