Псовы, (лат.) Canidae — родина ряда драпежникох ((лат.) Carnivora), котры суть в рядѣ положены меджи мачками ((лат.) Felidae) и медвѣдями ((лат.) Ursidae) подля анатомии слухового апарата и копонѣ. Копоню мают продовгасту, пысок доста довгый, могутный, валушный про хапаня и ношѣня.[1]
Псовы мають зо всѣх смыслох найлѣпшый пах, котрый навонок вызначать ся великыма, вогкыма ноздрями, а в том суть найлѣпшы межи ссавцями. Мають тыж барз тонкый слух, а менше быстрый зрок. Ходять на палцях, на передных лабах мають 5, а на задных — 4 персты, з пазурями недряпливыма и невтяжныма (окрем пса гиенового, котрый мать 4 персты на всѣх членах). Хвост мають довгый, погыбливый в корѣню, але неовладаный по довжцѣ. Вшиткы псовы выють, а дакотры брешуть. Бреханя не е резултатом одомашнѣня, понеже и дика лишка бреше.[1]
Псовы живлять ся живыма и мертвыма хребетныма, але и плодами ростлин. Добывають собѣ поживу двома способами. Лишкы, котры суть недружныма звѣрями, выслѣдять свою корысть плазять ся и прикрадують ся, а так нападають. Иншы псовы, наймя вовци, добывають собѣ поживу в сворках: выслѣдять корысть и отворено нападуть зо вшиткых сторон. Так укорыстять и векшого звѣря.[1] Дакотры псовы, напр. шакалы жиють в парах.
Свою територию значать сиклинов. Векшинов на територии ся живить невелика група, складена з главы и его потомкох.
Псовы, (лат.) Canidae — родина ряда драпежникох ((лат.) Carnivora), котры суть в рядѣ положены меджи мачками ((лат.) Felidae) и медвѣдями ((лат.) Ursidae) подля анатомии слухового апарата и копонѣ. Копоню мают продовгасту, пысок доста довгый, могутный, валушный про хапаня и ношѣня.
