O sarrio, chizardo u ixarzo (Rupicapra rupicapra) ye un bovido de la subfamilia Caprinae (a de las crabas e las güellas), que se troba en os monts Pirineus -por eixemplo en Ordesa y Mont Perdito- y a bells sarratos más d'Europa, como los de la Cingla Cantabrica, os Alpes, os Carpatos u o Caucas. Bells autors clasifican os eixemplars pirinencos y cantabricos como una especie aparti, Rupicapra pyrenaica, encara que isto no ye adoptato por tota la comunidat scientifica internacional.
L'equipe d'Andorra de rugby ye conoixito como Isards por ser l'animal que porta a federación de rugby d'Andorra en o suyo escudo. [1]
O sarrio ya lo nombre más cheneral con que se conoix en aragonés a iste animal, referindo-se sobretot a la variedat pirinenca. Tamién reciben o nombre de chizard(o), sisardo u ixarzo (ixarso en benasqués). Anque l'orichen de lo nombre no ye pas claro, pareix que provién d'una radiz prerromana pirinenca -izarr, probablement bascona. En catalán ye isard. En occitán ye sarri u isard en os Pireneus (y tamién camoç/chamoç en os Alpes). O francés isard u izard ye preso de l'occitán pirenenco.
A largaria de lo cuerpo en os eixemplars adultos ye d'entre 110 y 130 cm, más uns 3 cm de coda. L'altaria puede plegar dica 80 cm, y lo peso varía entre 20 e 30 kilos. O sarrio aragonés ye un poquet más chico que lo parient alpín. Es masclos son más grans que no las fembras, de colors más escuras y marcatas, y con uns cuernos más largos que nunca no pierden. Son mesmo capables de puyar por penyas y chelo sin guaires problemas.
A color de lo pelache muda seguntes a estación. De verano ye royisco, con o morro, cuallo, pancha e glutios de color blanguinyosa, y una faixa de pelache negro dende laa boca dica los güellos y por dezaga la coda. D'hibierno, por contra, o pelo ye muito más preto y fusco. O lomo, as garras y lo cuallo por dezaga se tornan de color parda escura u griseta. O negro de la cara y la coda se fa más gran; una faixa negra bien marcata apareix por debant dende la parti posterior de las orellas ta lo rancadero de lo cuallo, y tamién en a parti alta de las garras y en os costatos de lo cuerpo. A cara, o cuallo por debán, os pietz, pancha y glutios son blancos.
Os sarrios son animals socials que van en grupetz mirando tascas pa paixentar, pus son herbivoros. Os grupetz son formatos nomás que por masclos (que tamién puede que campen solencos) u por fembras con as crías suyas, os quals no s'achuntan soque en os tiempos en que son amareixederas.
Os suyos costumbres son diurnos. Vista, Fato y udito son más que buanos, o que lis premite d'identificar a escape a os suyos depredadors, sigan onsos, lupos u hombres. Un altro periglo ta los sarrios son os lurtes, que pueden matar-ne rabanyos enters en as mayencatas.
L'asperanza de vida de los sarrios ye d'uns 20 anyos.
Os sarrios de la peninsula Iberica son amareixeders entre octubre y noviembre, mientres que los d'Europa central en son en entre noviembre y as primeras semanas d'aviento. En ixe tiempo, es grupos de masclos siguen os de fembras y se i achuntan, viyendo-sen alavez poderosas luitas entre masclos, que s'acapizan la un contra l'altro ta tener o dreito de reproducir-se.
A chestación dura bellas 20 semanas, que remata en naixer una sola cría. O sarriet plega ta la madureza sexual entre los 2 e 4 anyos, fendo-lo antes as fembras que no los masclos.
S'ha citato casos d'hibridos entre sarrios y crabas, siempre machorras, encara que nunca no s'ha puesto prebar-ne la existencia de trazas fefacients.
O sarrio, chizardo u ixarzo (Rupicapra rupicapra) ye un bovido de la subfamilia Caprinae (a de las crabas e las güellas), que se troba en os monts Pirineus -por eixemplo en Ordesa y Mont Perdito- y a bells sarratos más d'Europa, como los de la Cingla Cantabrica, os Alpes, os Carpatos u o Caucas. Bells autors clasifican os eixemplars pirinencos y cantabricos como una especie aparti, Rupicapra pyrenaica, encara que isto no ye adoptato por tota la comunidat scientifica internacional.
L'equipe d'Andorra de rugby ye conoixito como Isards por ser l'animal que porta a federación de rugby d'Andorra en o suyo escudo.
