A fuina de papo blanco (Martes foina (Erxleben, 1777)) ye un mamifero carnivoro d'a familia d'os mustelidos, de pelo marron claret y coda de forma d'escoballo más lierga que no en as suyas parients as martas. Fa una mida arredol d'os 40 u 50 cm de cuerpo, fendo quasi 1,5 Kg de peso, con una caracteristica taca blanca en o peito y a parte ventral d'o cuello, o «papo», más extensa que no en altras especies d'o chenero.
En comparanza con as suyas parients arboricolas, as fuinas de papo blanco s'están a mayor parte d'os tiempos en o suelo, y asobén viven no guaire luent d'os asentamientos humans, plegando dica a habitar foratos d'as casas, en as falsas y as bordas. Son istes os animals que més asobén se siente decir que s'escuelan adintro d'os galliners u conilleras e i fan cerinadas. En aragonés, quan naide se refiere a un animal como fuina sin d'especificacions (color d'o papo), lo más habitual ye que se siga parlando d'ista especie.
S'alimentan d'animals chicotz, uevos, muixons, ratos, invertebratos u fruita, pero una d'as cosas que más asobén se'n siente decir ye de que esgarrapan as arnas ta mirar-se-ie la miel, causando mal en as expleitacions apicolas domesticas.
