Ła cicerbita viołeta (nome sientifego Cicerbita alpina) xe na piantexeła erbasea deła fameja dełe Asteraceae na volta dite Compositae, coi fiori de un bel cołor blu - viołeto. Ła trovemo su Alpi e Prealpi, spece 'ntei boschi umidi o drio i rij e i fosi. In Carnia i ła ciama radic di mont. Łe foje pi base łe xe larghe 8 cm e longhe 20 cm. I fiori i ga 5 petali de cołor viołeto e i xe ingrupà in infioresense.
Pare ke'l nome vegna dal latin cecer (cece), par via dełe picołe semense, o senpre dal latin cicharba (na pianta ke ghe somejava mensionà dal dotor personal deł'imperador Teodosio, Marcello Empirico de Bordeaux).
Ła cicerbita viołeta crese su tute łe montagne d'Europa, dai Pirenei ałe Alpi, dała Scozia ała Scandinavia, fin ai Carpazi e ai Urałi. Ła quota dove ke ła crese mejo xe fra i miłe i miłe otoxento metri.
Se dopara i pecol e łe foje, ma soratuto i buti xovani, prima ke i cresa (in majo ghe xe soło un paro de setimane ke se pol sfrutare par tirarli su in tenpo). Se pol magnarli crudi o coti. Se pol meterli sotojo. Naltra maniera par magnarli xe insieme ała puìna fumegà. Se pol anca scotarli in ojo, sałe, axedo e droghe.
Sicome ghi na tirà su masa 'ntei ani scorsi, sta pianta, in Trentin e in Friuli-Venesia Giulia xe proteta e se pol tirarghine su soło in picołe quantità, come ke se fa coi funghi.
Ła cicerbita viołeta (nome sientifego Cicerbita alpina) xe na piantexeła erbasea deła fameja dełe Asteraceae na volta dite Compositae, coi fiori de un bel cołor blu - viołeto. Ła trovemo su Alpi e Prealpi, spece 'ntei boschi umidi o drio i rij e i fosi. In Carnia i ła ciama radic di mont. Łe foje pi base łe xe larghe 8 cm e longhe 20 cm. I fiori i ga 5 petali de cołor viołeto e i xe ingrupà in infioresense.
