Pinus squamata X. W. Li

Pinus squamata (zh: 巧家五针松) ^[2] er furutegund sem finnst aðeins á einum stað í Qiaojia-héraði, Norðaustur-Yunnan, Kína, í um 2200 m hæð.^[1] Einungis er vitað um 20 tré.

Tegundina fann J.Q. Pangzhao í apríl 1991. Síðar það ár rannsakaði Li Xiang-Wang tegundina og lýsti henni árið 1992. Hún líkist að mörgu leyti P. rzedowskii og sumum öðrum furum í undirættkvíslinni Cembroides.

Lýsing

Hæð á fullvöxnum trjám er ekki þekkt þar sem ekkert þekktra trjáa er fullvaxið, en þau gætu hugsanlega náð 30 m hæð eða meira. Búsvæðið er opið skóglendi, runnlendi, og graslendi þar sem tegundin vex í bland við P. yunnanensis.

Hún er með keilulaga krónu og grágrænan börk sem flagnar og verður brúnn með aldri, svipað og hjá hinni skyldu næfurfuru (P. bungeana). Sprotarnir eru rauðleitir til grænbrúnir og ýmist hærðir eða hárlausir. Barrnálarnar eru 4 til 5 saman, hangandi, 9 til 17 cm langar og 0,8 mm breiðar, gljáandi grænar að ofan með hvítri loftaugarás að neðan.

Könglarnir eru keilulaga til egglaga, rauðbrúnir, og 9 cm langir og 6 cm breiðir þegar þeir eru opnir. Þeir opnast við þroska í september til október á öðru ári og sleppa aflöngum svörtum fræjunum (4-5 mm löng með 16 mm væng).^[3]

Verndun

Pinus squamata er sjaldgæfasta þekkta tegund fura, en Pinus torreyana, (í útrýmingarhættu) næstsjaldgæfust.^[4] Útbreiðslusvæðið er nú friðað og hefur tegundinni verið fjölgað með því að planta henni út í því.^{[5] [6]}

Tilvísanir

Ytri tenglar

• Flora of China
• Photo of cones

Þessi líffræðigrein er stubbur. Þú getur hjálpað til með því að bæta við greinina.

Wikimedia Commons er með margmiðlunarefni sem tengist

Pinus squamata

Wikilífverur eru með efni sem tengist

Pinus squamata